gurit

Kapang

                           

Daksawang anane sesawangan

mung memba wewayanganmu

mung eling solah bawamu

mung sengsem manis esemmu

Pranyata,

apadene rasa

saka kalbu tumekaning pandulu

Atiku pancen kadhung

ketaman sawijining panandang

                kapang mring sliramu

Kaya Semut

                         

Semut ireng-ireng

mlaku rindhik-rindhik

ngupadi oangan ngupadi mangsan

mrih sesambunganing dawaning panguripan

Sanadyan upyek tumandang

salam esem kang ngujiwat

tan keri marang liyan

ora preduli kahanan

ora preduli apa rinasa

ora preduli nelangsa

mung sadrema uncal esem luwih utama lan prasaja

Manungsa sajaka rumangsa

bebrayan ing sapada-pada

ngreksa katentreman lan tepa salira

sadaya dadi kang utama

Donga

Wengi iki

nalika candra andhadhar

lintang-lintange cahya sumunar

tan lali bayu liwat nyumiliri driya

dakparani parane gumricike toya

mbasuh jiwa lan raga

siyaga nyembah mring Kuwasa

Ing sujudku lan dedonga

dakpasrahake apa kang ana

marang Raja kan nguwasani donya

moga bisa luwih miguna

Kembang Katresnan

Winih kang sira tandur

ing taman sajerone nala

dak rumat, dak reksa, dak upakara

dak rabuk mawi kapracayan

dak siram kanthi rasa sabar

                Wancine kembang saya ngrembaka

                mekar endah elok sulistya

                arum anggeganda

                iki kangmas,

                kembangku kang wus sumadya

                pethikana sasenengmu

                merga wus dadi duwekmu